टोमाटो पालक पुलाव

टोमाटो पालक पुलाव 

२००७ साली छत्रपती शिवाजी महाराजांच्या ज्या एनसाय्क्लोपिडीया वर मी काम करतो आहे त्यासाठी महाराजांच्या दक्षिणेतल्या तीन राज्यांत असणाऱ्या तब्बल १०० एक किल्ल्यांच्या फोटो शूट साठी मी गेलो होतो..तब्बल पूर्ण २८  दिवस

तंजावर वरून परत यायला निघालो आणि तिथे अय्यंपेट नावाच्या एका गावात एका रात्री मुक्काम केला. त्यावेळी तिथे एका तमिळ बांधवाने मला तिथला एक स्थानिक भाताचा प्रकार खाऊ घातला होता......
दिवसभर दमल्यावर खालेल्ला तो स्वादिष्ट भात म्हणजे आम्हा तिघांसाठी पर्वणीच होती...

साध्या चुलीवर अनेकानेक स्थानिक उपलब्ध पदार्थ घालून शिजवलेला तो भात इतका लजीज कसा झाला आहे असे तोडक्या मोडक्या भाषेत संवाद साधत मी त्या लुंगीत वावरणाऱ्या तमिळ बंधूला विचारलं....

त्याने तेव्हा ती जी रेसिपी मला सांगितली त्या रेसिपी मध्ये माझ्या स्वतःच्या काही गोष्टी मिसळून केलेला हा पुलाव म्हणजेच टोमाटो-पालक-पुलाव...

"अरे रोज भाज्या भाज्या काय चाललय तुझ ब्लॉग वर ? तुझ्या सारखाच् मी पण डाय-हार्ड भात-फॅन आहे...
भाताची होवून जावु दे यार एखादी सोप्पी आम्हा पुरुषांनाही जमेल अशी डिश."
माझा एक मित्र आज दुपारी मला म्हणाला...

म्हणून आत्ता करतोय ही बासमती गंधाची एक भन्नाट डिश...

"टोमॅटो-पालक -पुलाव"

मित्रांनो आणि मैत्रिणींनो...

कधी कधी एखादा दिवस तुमचाच असतो..

त्या दिवशी तुम्ही जे काही करता ते भन्नाटच होतं...

कालचा दिवस असाच होता..

काय भन्नाट झाला होता हा पुलाव...

चला तर मग..."नमनाला घडाभर तेल नको"च....

साहित्य 

दिल्ली राईस - २२५ ग्राम (छान लांब टपोऱ्या दाण्यांचा जुना तांदूळ निवडा)
टोमाटो - ४ मोठे लालबुंद पिकलेले टोमाटो (३ टोमाटो धारदार सुरीने बारीक चिरलेले...एका टोमाटोचे मोठे आठ तुकडे करा )
पालक - बेबी पालक साधारण ३०/४० पाने (फार जून पालक पाने शक्यतो नको...बेबी पालक लगेच शिजतो आणि छानही लागतो, अगदीच बेबी पालक नाही मिळाला तर मोठ्या पानांचा पण किमान ताजा कोवळा पालक निवडून घ्या , पणे मधोमध चिरून घ्या आणि देठ काढून टाका )
गाजर - ३ गाजरे किसणीवर किसलेली
कांदे - २ मध्यम आकाराचे कांदे बारीक चिरलेले
तेल - ३ चमचे (ही डिश जर लोण्यात केलीत तर सॉलिड भन्नाट लागते...मी लोण्यावर केली होती...घरच्या साजूक लोण्यात)
लसूण - ८ पाकळ्या ठेचलेल्या
जिरं पावडर - २ चमचे
धने पावडर - २ चमचे
काजू - ५० ग्राम न खारवलेले काजू
मीठ - २ चमचे
काळी मिरी पावडर - २ चमचे
पुदिना - २० पाने
हिरवी मिरची - १ बारीक उभी चिरलेली
आलं - एकदम कमी...अगदी छोटासा तुकडा ठेचलेला
साखर - एक चमचा

पाककृती 

१) दिल्ली राईस वाहत्या पाण्याखाली २/३ वेळा धुवून नंतर एका मोठ्या बाउल मध्ये साध्या पाण्यात तब्बल २० मिनिटे भिजत ठेवा.

२) २० मिनिटांनंतर पूर्ण पाणी काढून टाका...
जाड बुडाचे एक मोठे भांडे घ्या...
त्यात २ चमचे मीठ टाकून हलवून हे पाणी पूर्ण उकळा....
आता त्यात आपला दिल्ली राईस घाला...
एकदा खालीवर हलवा...
आणि साधारण १० मिनिटे पर्यंत असेच मध्यम अग्नीवर ठेवा.

३) दुसऱ्या एका जाड बुडाच्या भांड्यात तेल/लोणी घ्या किंचित गरम करा आणि त्यात आलं-लसूण टाकून व्यवस्थित लाल होई पर्यंत परता.,,,,
हिरवी मिरची टाकून किंचित दाबून परता...
आता लगेच सगळा कांदा टाकून कांदा सोनेरी होईस्तोवर परता.
आता सगळे टोमाटो टाकून पुढील ५/७ मिनिटे परता....
आता यात एक चमचा साखर आणि एक चमचा मीठ टाकून परत...
आता या मिश्रणाला मस्त पाणी सुटेल.

४) आता दुसऱ्या भांड्यात आपण शिजत ठेवलेला तांदूळ त्यातील सगळे  पाणी काढून टाका आणि तो सगळा तांदूळ आता  या तयार मिश्रणाच्या पातेल्यात हळुवार नजाकतदार रीतीने ओता.....
आणि आता वरखाली हळुवार २/४ मिनिटे प्रेमाने अश्या रीतीने परता कि भांड्यातले सगळे मिश्रणाचे कोटिंग या तांदळाला अलगद वेश्टेल.
(आता यापुढे पूर्ण डिश होईपर्यंत या तांदळासोबत अजिबात धसमुसळे पणा करायचा नाही बर का ? तांदूळ परता म्हटलं कि हळुवार लक्षपूर्वक परतायचं आणि हलवायचा...नाहीतर हा तांदूळ मोडेल..चवीत काहीच फरक पडत नाही...चव भन्नाटच लागते फक्त प्लेटिंग आणि सौंदर्य म्हणून पण काही गोष्ट असते का नाही ?)

५) आता यात धने जिरे पावडर स्प्रीन्कला आणि वर खाली हळुवार परतून घ्या...
आता किसलेली  अर्धी गाजरे यात ओता आणि परता आणि परत उरलेली किसलेली गाजरे घालून परत हलवा....
आता यात मीठ आणि काळी मिरी पावडर घालून परता....

६) आता या भांड्याला घट्ट झाकण लावून एकदम मंद अग्नीवर साधारण २० मिनिटे शिजू द्या.

७) आता झाकण काढून बेबी पालकाची अर्धी पाने या संपूर्ण भातावर अशी पसरून ठेवा कि सगळा भात झाकून जाईल...
कुठून ही दिसणार नाही...
आता भांड्याचे झाकण मुद्दामूनच अलगद भांड्यावर ठेवा...
बाजूनी वाफ जाताना दिसली पाहिजे आपल्याला...
हे असे साधारण ३/४ मिनिटे ठेवा (पूर्ण झाकण घट्ट लावाल आणि वाफ गेली नाही बाहेर तर आत पालकाला पाणी सुटेल आणि पुलावाची खिचडी होईल...काळजी घ्या)
आता झाकण काढून बघा....
वरची पालक पाने शिजल्याने मोडली गेली आहेत आणि रंग बदलून खाली फुस्स होऊन पडली आहेत....
आता ही शिजलेली पालकाची पाने हळुवार पणे भात फिरवत त्या भाताखाली जावू द्या...
आता वर आलेल्या भातावर पुदिन्याची पाने पसरा आणि आता  बेबी पालकाची उरलेली अर्धी पाने या संपूर्ण भातावर पुन्हा एकदा अशी पसरून ठेवा कि सगळा भात झाकून जाईल...
कुठून ही दिसणार नाही...
आता भांड्याचे झाकण मुद्दामूनच अलगद भांड्यावर ठेवा...
साधारण ३/४ मिनिटे....
बाजूनी वाफ जाताना दिसली पाहिजे आपल्याला....
आता झाकण काढून ठेवा आणि एकदम मंद अग्नीवर हा पुलाव असाच राहू द्या...
साधारण ४/५ मिनिटे...
या वेळी पातेल्याताला खालचा भात किंचित लागतो आणि खरपूस भाजला जातो,,,
नंतर प्लेटिंग करताना हा खरपूस भात भन्नाट लागतो


८) दुसऱ्या एखाद्या भांड्यात तेल किंवा लोणी घेऊन सगळे काजू मंद अग्नीवर परतून घ्या...सोनेरी होईस्तोवर...
आणि आता हे परतलेले काजू आपल्या डिश वर पसरा...

झाली आपली डिश तयार....

मस्त प्लेटिंग करा...
सोबत आवडत असेल तर पापड आणि लोणचे घ्या...
कांद्याच्या चकत्या ही करून घ्या....

रेसिपी कशी वाटली नक्की सांगा...

आणि  ही डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........

तुमचा (नम्र) मित्र 

मिलिंद 

पडवळ ट्विस्ट

 पडवळ ट्विस्ट 

खरतरं आम्ही वेर्लेकर सगळ्या भाज्या खातो...

अगदी कुठल्याही...कारलं सुद्धा...आणि पडवळ सुद्धा

पण बऱ्याच लोकांना कुणास का ठाऊक का पण पडवळ विशेष आवडत नाही..

May be...पडवळ या भाजीला स्वतःची अशी विशेष टेस्ट नाहीये...किंवा या भाजीमध्ये पाण्याचा कंटेंट तसा जास्त आढळतो म्हणून असेल...कदाचीत

पण....  पण बऱ्याच लोकांना  पडवळ विशेष आवडत नाही..हे मात्र खर 

मी हा ब्लॉग सुरु केल्यावर , माझ्या एका डॉक्टर मैत्रिणीने मला सकाळी सकाळी फोन केला आणि म्हणाली,"अरे मित्रा, माझी मुलगी पडवळ, कारलं, दुधी भोपळा अश्या अत्यंत बहुगुणी भाज्या खाण तर दूर राहिलं या भाज्यांकडे साध ढुंकूनही पहात नाही... तुझ्या पंचतारांकीत रेसिपीज समवेत काहीतरी भन्नाट कर रे रेसिपी या आणि असल्या भाज्यांसाठी...म्हणजे तरी माझी मुलगी या भाज्या आवडीने खायला सुरुवात करेल."

मी लगेच म्हणलं, " ठीक आहे...नक्की करतो...सगळ्यांनाच याचा फायदा होईल."

आणि मग मी बरेचं प्रयत्न करून ही पडवळच्या  भाजीची रेसिपी तयार केली.
घरात सगळ्यांना खायला घातली...
अर्थातच सगळ्यांनाच ती आवडली आणि आता म्हणूनच "नावडत्या भाज्यांच्या आवडत्या सेक्शन" मध्ये आज मी पहिली भाजी सादर करतोय...
पडवळ ट्विस्ट 

साहित्य 

पडवळ - अर्धा किलो (पडवळ जितका ताजा , कोवळा आणि लुसलुशीत घ्याल तेवढी ही भाजी भन्नाट लागेल)

तेल - ४ चमचे 

जिरे - २ चमचे 

कांदापात - १२ कांदे (कांदापात घेताना एकदम कोवळी घ्या...म्हणजे कांदा अगदी लहान असतो आणि पाने पण लहान, कोवळी आणि हिरवीगार असतात...कांदापात घेतल्यावर धावत्या पाण्याखाली धुवून नंतर एकदम बारीक चिरून घ्या आणि वेगळ्या भांड्यात काढून घ्या)

टोमाटो - ५ मध्यम आकाराचे लालबुंद 

आलं - २ इंच लांब बारीक किसलेलं 

लसूण - ५ मध्यम आकाराच्या पाकळ्या ठेचलेल्या 

हिरव्या मिरच्या - ४ बारीक चिरलेल्या 

मीठ - एक चमचा 

लाल तिखट - एक चमचा 

जिरे पावडर - २ चमचे
धने पावडर - २ चमचे 

साखर - ३ चमचे 

बेसन पीठ - ४ चमचे

कोथिंबीर - २ चमचे बारीक चिरलेली

हिंग - चिमुटभर 

पाककृती 

जरा जास्त  वेळ लागला तरी हि डिश शक्यतो मंद अग्नीवर करा...जास्त छान लागते 

१) पडवळ चिरून आतल्या बिया काढून टाका आणि आपण नेहेमी करतो तश्या बारीक काचऱ्या करून घ्या. बाजूला ठेवून द्या.

२) या कृतीमध्ये नंतर आपल्याला भांड्यावर मोठे ताट ठेवून त्यावर पाणी ओतून वाफेवर ही भाजी शिजवायची आहे...तेव्हा भांड्यावर ताट व्यवस्थित बसेल असे भांडे ही भाजी करण्यासाठी निवडा....
मोठ्या जाड बुडाच्या भांड्यात २ चमचे तेल घालून , मध्यम अग्नी करून, तेल तापल्यावर त्यात चिमुटभर हिंग घाला आणि हलकेच परता...आता जिरं घालून जिरं तडतडे पर्यंत परता,

३) जिरं तडतडल्यावर अग्नी मंद करून आता पूर्ण कांदा आणि पात घालून ५/६ मिनिटे पूर्ण परतून घ्या...
कांदा पात परतून झाल्यावर पूर्ण निम्मी होईल....
आता यात हिरव्या मिरच्या घाला,,,व्यवस्थित परता....
आलं आणि लसूण ठेचा घाला आणि व्यवस्थित परता...
आणि सर्वात शेवटी टोमाटो घालून नीट परता....

(हिरव्या मिरच्या घातल्यापासून ते टोमाटो घालून परते पर्यंत सतत हे मिश्रण हलवत राहा...
अजिबात आळस नको...
हे मिश्रण जर खाली लागले अथवा करपले तर पडवळच्या या भाजीचे 'कल्याण' होईल)

३ नंबर ची ही परता परती साधारण एकंदर ६/८ मिनिटे चालते...

हे मिश्रण तयार झाल्यावर आता जरा दम घ्या...आणि या मिश्रणाचा वास घ्या...काय जबरा येतो आहे ना वास...

४) आता या मिश्रणात मीठ घालून परता...
आता यात धने-जिरे पावडर, लाल तिखट आणि सर्व साखर घाला आणि अजून किमान ३/४ मिनिटे परता.

आता हे मिश्रण साधारण सरसरीत होईल...

आता यात चिरलेला पडवळ घालून हे मिश्रण या पडवळला सगळीकडून नीट लागेल असे व्यवस्थित परतून घ्या.

 ५) आता या भांड्यावर भांडे व्यवस्थीत झाकले जाईल असे ताट ठेवा , या ताटात सर्व कडा व्यवस्थित भरतील येव्हढेच साधे पाणी ओता...आणि अग्नी मंद आहे ना हे चेक करून हे मिश्रण असेच साधारण ५ मिनिटे अग्नीवर न हलवता ठेवा.

६) आता ताट चिमट्याने अलगद बाजूला उतरवून ठेवून आतली भाजी पुन्हा एकदा व्यवस्थीत हलवून घ्या...आणि मगास सारखेच पुन्हा तेच गरम पाणी असलेले ताट भांड्यावर ठेवा...अजून ४/५ मिनिटांसाठी 

७) आता ताट बाजूला काढून भाजी शिजली आहे ना हे एक पडवळाचा तुकडा खावून बघा आणि आता भाजी शिजली असेल तर एक चमचा बेसन कोरड्या चमच्याने सर्व भाजी वर भुरभुरवा...भाजी खाली वर नीट परतून घ्या...२ मिनिटे थांबा......पुन्हा एक चमचा बेसन सर्व भाजी वर भुरभुरवा...भाजी खाली वर नीट परतून घ्या...२ मिनिटे थांबा...आणि आता पुन्हा एकदा सर्व उरलेले बेसन भुरभुरवा...आणि भाजी पुन्हा एकदा खाली वर नीट हलवून घ्या...

८) आता ही भाजी तयार झाली आहे फक्त मंद अग्नीवर ही भाजी आता अशीच अजून साधारण ३/४ मिनिटे राहू द्या....

घरातल्या ज्या ज्या मेंबर्स ना पडवळ आवडत नाही त्यांना लगेच टेबलावर बोलवा...मस्त ताटे वाढा आणि भोजन मंत्र म्हणून जेवायला सुरुवात करा...गरमागरम आणि थेट अग्नीवरून ताटात

फक्त ही भजी अग्नीवरून उतरवून थेट ताटात गेली पाहिजे...जशी जशी ही भाजी थंड होत जाईल तसे या भाजीतले आपल्या मिश्रणाचे तयार झालेले नैसर्गिक ज्युसेस नष्ट पावू लागतील हे ध्यानात ठेवा...

एक विनंती...
ही भाजी डब्यात घेवून जावू नका...
गरमागरमच छान लागते...
आणि टीव्ही पाहात पाहात ही भाजी खावू नका...
एक घास घेतल्यावर जो काही स्वाद हि भाजी तोंडामध्ये तयार करते त्याचा अनुभव घ्यायचा असेल तर टीव्ही बंद करा...
आणि आता सावकाश जेवा......

वेडे व्हा..वेडे करा

खुप खा...खूप जगा   

रेसिपी कशी वाटली नक्की सांगा...

आणि  ही डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........

स्टफ वांगी

स्टफ वांगी 

Stuff Brinjal

मी एक भन्नाट भात'प्रेमी आहे आणि याचा मला रास्त अभिमान आहे...
कितीही आणि कसे ही वजन वाढले तरी माझ्या या भात'प्रेमाचा पाईक होण्याचा मी निष्ठेने प्रयत्न करेन अशी जाहीर प्रतिज्ञा आज मी घेतो आहे....

हा हा हा हा ...

विनोदाचा भात...sorry sorry ...विनोदाचा भाग वेगळा...

आजची ही डिश भन्नाट युरोपिअन डिश आहे...
"रीसोटा" या इटालियन खाद्य प्रकारामध्ये ही डिश प्लेटिंग मध्ये साईड डिश म्हणून वापरली जाते...

आपण ही डिश मेन डिश म्हणून वापरूया...
थोडी किचकट आहे खरी...
पण अगदी थोडी किचकट...

पण...
शेवटी काय...
"धीर धरा रे धीरापोटी फळे रसाळ गोमटी..."

चला तर मग...एका भन्नाट डिश कडे वळूया मित्रांनो आणि मैत्रिणींनो...

स्टफ वांगी 

चार जणांसाठी साहित्य 

लहान/मध्यम आकाराची वांगी - १६
चिंचेचा कोळ (जास्त घट्ट नाही...चिंचेचे पाणी म्हणूया ...) -
८  चमचे (बाजारात मिळणारी घट्ट पेस्ट साधारण ३ चमचे घेऊन त्यात गरम पाणी घालून सुद्धा ही चिंच करता येईल)
तेल - ४ चमचे (मोहोरीचे तेल असेल तर भन्नाट लागते ही डिश...अन्यथा दुसरे कुठलेही चालते...कारण चिंच आणि तिखटाचे स्वाद मोहोरी जास्त छान खुलवते )  
कांदे - मध्यम आकाराचे दोन कांदे बारीक चिरून
आले - ४ चमचे ताजे छान किसलेले आले
लसूण - ८ मोठ्या पाकळ्यांची  पेस्ट
धने - २ चमचे
जिरे - २ चमचे
पांढरी खसखस - ४ चमचे
पांढरे तीळ - ४ चमचे
नारळ - ४ चमचे ताजा खवलेल्या नारळाचा कीस
शेंगदाण्याचा कुट - चांगल्या भाजलेल्या शेंगदाण्याचा ५  चमचे  साधारण जाडसर कुट
लाल तिखट - १ चमचा
मीठ - ३ चमचे
कडीपत्ता - १५ पाने
सुक्या लाल मिरच्या - ५  उभ्या चिरलेल्या (शक्यतो काश्मिरी घ्या...रंग बेफाम सुंदर येतो)
कोथिंबीर - ४ चमचे बारीक चिरलेली
हिंग - चिमुटभर
साखर -  दीड चमचा

पाककृती 

१) आपण आणलेली वांगी आधी वाहत्या पाण्याखाली मस्त धुवून घ्या आणि एका भांड्यात नीट रचा...
कसली भन्नाट तुकतुकीत दिसतात ही वांगी बघा...आणि मस्त खुश व्हा...थोड्याच वेळात ही वांगी तुम्हाला जबऱ्या आनंद देणार आहेत....

२) आता या वांग्यांना धारदार सुरीने उभे क्रॉस दोन  छेद द्या...
अगदी खालपर्यंत छेद नेऊ नका नाहीतर नंतर भरल्यावर स्टफिंग निसटून जाईल...
आता ही वांगी किंचित गरम पाणी करून त्यात २ चमचे मीठ घालून त्यात पूर्ण बुडवून ठेवा ...तब्बल २० मिनिटे

३) दोन चमचे तेल जाड बुडाच्या भांड्यात तापवा आणि तापल्यावर  त्यात हिंग टाकून हलकेच परतून घ्या...
आता त्यात सगळा कांदा टाकून मंद अग्नीवर कांदा सोनेरी होईस्तोवर परतून घ्या. आता आलं आणि लसूण टाकून हलक्या हातांनी साधारण एक-दीड मिनिट परतून घ्या.

४) आता यात धने आणि जिरे घालून दोन मिनिटे व्यवस्थीत परता.
आता खसखस तीळ आणि खवलेला नारळ घालून खसखस छान लाल होईस्तोवर परता...
हे परतत असतानाच अर्धा चमचा मीठ आणि एक चमचा साखर घालून परता...
सतत.... न थांबता परतत राहा...
खसखस घातल्यामुळे हे मिश्रण खाली चिकटू शकते...
म्हणून न थांबता परतत रहा....साधारण २ मिनिटे
साखर आणि मीठ घालून परतल्यावर पाणी सुटेल...
सुटायला हवे...
हे पाणी सुटायलाच हवे नाहीतर आधी घातलेले जिन्नस खाली चिकटतील आणि करपतील...
हे टाळण्यासाठी वाटल्यास अजून अर्धा चमचा साखर घाला...मीठ वाढवू नका...

आता हे मिश्रण थंड करत ठेवा...
आणि थंड झाल्यावर साधारण १० चमचे गरम पाणी घालून मिक्सर मध्ये पेस्ट करून घ्या...
ही पेस्ट साधारण घट्ट व्हायला हवी...
वांग्यांच्या आत भारता येण्यायेवढी...

५) आता मिक्सर मधून काढलेली पेस्ट एका प्लेट मध्ये घ्या आणि त्यात शेंगदाण्याचा कुट , लाल तिखट पावडर, मीठ आणि ३ चमचे चिंचेचा कोळ घालून मस्त हलक्या हातांनी मिक्स करून घ्या...हे तयार झाले आपले स्टफिंग

६) आता वांगी पाण्याबाहेर काढून कोरडी करून घ्या आणि मगाशी आपण ज्या चिरा दिल्या आहेत त्यामध्ये हे स्टफिंग हळुवार हातांनी दाबून भरून घ्या....

७) उरलेले तेल मगासच्याच भांड्यात घालून मंद अग्नीवर तापू द्या आणि तापल्यावर त्यात आधी धुतलेली कडीपत्याची पाने घाला...एक दोन वेळा परता आणि आता उभ्या चिरलेल्या लाल मिरच्या यात घालून मस्त परतून घ्यायला सुरुवात करा...
लाल मिरच्या काळसर होईस्तोवर परतत रहा...पण मंद अग्नीवर...अजिबात अग्नी वाढवू नका...अन्यथा मिरच्या काळ्या होतील पण या मिरच्यांचा तिखट स्वादाचा अंश तेलात उतरणार नाही

८) आता यात  मिरच्या काळसर झाल्यावर उरलेला चिंचेचा कोळ आणि  उरलेले स्टफिंग टाकून जरा व्यवस्थित परतून घ्या...
आणि सर्वात शेवटी आता या भांड्यात आपण भरलेली वांगी हलक्या हातानी, पूर्ण भांड व्यापेल अशी पसरून ठेवा...
भांड्यावर झाकण ठेवा...
मंद अग्नीवर साधारण १५/२० मिनिटे वांगी शिजू द्या...
आता झाकण काढून भांड्यातल मिश्रण हलक्या हातांनी वान्ग्यांवर मस्तपैकी फिरवा...

आणि आता पुन्हा ही वांगी फक्त ५ मिनिटे अग्नीवर ठेवा...

कोथिंबीर स्प्रिन्कला...

झाली आपली "स्टफ वांगी" तयार.....

मस्त प्लेटिंग करा...

गरमागरम वाफाळलेला मोकळा भात प्लेट मध्ये घ्या...मधोमध
त्यावर ही वांगी, भांड्यात खाली प्रोसेस झालेल्या स्टफिंग सोबत, भातावर हलकेच प्लेस करा...
सोबत कांद्याच्या गोल चकत्या, आवडत असेल तर टोमाटो आणि लिंबू घ्या...

घरातल्या सगळ्यांना बोलवा...

घोटभर पाणी प्या...
मस्त छान सुवासांच्या सान्निध्यात प्रसन्न चित्ताने भोजन मंत्र म्हणा...
आणि आता...

आक्रमण.................

आवडत असेल तर वांग्यांवर मस्त लिंबू पिळा थोडासा...
चमच्याच्या सहाय्याने स्टफिंग सकट वांग्याचा एक तुकडा तोडा...त्या सोबत गरमागरम भात त्या सोबत घ्या आणि मस्त हा घास तोंडात सरकवा...डोळे मिता...दोन छार वेळा चावल्यावर...कसं वाटतंय ?

भन्नाट ना ?

एन्जॉय करा......

एक विनंती...
ही भाजी डब्यात घेवून जावू नका...
गरमागरमच छान लागते...
आणि टीव्ही पाहात पाहात हि भाजी खावू नका...
एक घास घेतल्यावर जो काही स्वाद हि भाजी तोंडामध्ये तयार करते त्याचा अनुभव घ्यायचा असेल तर टीव्ही बंद करा...
आणि आता सावकाश जेवा......

वेडे व्हा..वेडे करा

खुप खा...खूप जगा   

रेसिपी कशी वाटली नक्की सांगा...

आणि  ही डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........

कलर्ड ड्राय स्पाईस

"कलर्ड ड्राय स्पाईस" 

फ्लॉवर म्हटलं कि आपल्याला आठवते बहुतकरून फ्लॉवर बटाटा रस्सा किंवा कुर्मा...

अर्थात...आपल्या स्वयंपाकघरातला परंपरागत फ्लॉवर बटाटा रस्सा हा मस्त गरमागरम पोळी सोबत अथवा वाफाळलेल्या भातावर लोणच् आणि पापडासोबत काय किलिंग लागतो हे सांगणे नलगे....

पण फ्लॉवर या अत्यंत बहुगुणी भाजीच्या सहाय्याने एक अत्यंत वेगवान तरीही लज्जतदार आणि पौष्टिक डिश तयार केली आहे मी....
आणि या डिशची पौष्टिकता अजून वाढवण्यासाठी मी फ्लॉवरसोबत या डिश मध्ये घातलं आहे गाजर आणि मटार...

हि भाजी तशी बऱ्यापैकी कोरडी होते...
पण मसाल्यांच्या मुक्त संचाराने सणसणीत लागते......

चला तर मग या जबऱ्या लज्जतदार, करायला अत्यंत वेगवान आणि तरीही भन्नाट पौष्टिक डिश करायला सुरुवात करूया मित्रांनो आणि मैत्रिणींनो............

साहित्य 

फ्लॉवर - अर्धा किलो (छान ताज्या पांढऱ्या रंगाचा आणि सध्या नजरेला सुद्धा सगळी फुले नीट छान मोकळी दिसतील असा फ्लॉवर निवडा...फ्लॉवर ताजा नसेल तर फ्लॉवर ची फुले मलूल होतात आणि क्रिस्प दिसत नाहीत)
गाजर - ३ मध्यम आकाराची (गाजरे फार मोठी घेऊ नका, जून असतात, मध्यम आकाराची छान लालबुंद ताजी गाजरे घ्या)
मटार - १०० ग्राम (पूर्ण वर्षभर ताजे मटार मिळणार नाहीत सो फ्रोझन चालतील)
तेल - ३ चमचे 
तमालपत्र - २ मध्यम आकाराची 
लवंग - ८ 
दालचिनी - एक इंची तुकडा 
वेलची - ६ 
काळी मिरी - १० 
लिंबू रस - ४ चमचे 
पांढरे तीळ - २ चमचे 
सुकी लाल मिरची - २ मध्यम आकाराच्या 
कसुरी मेथी - एक चमचा 
हिंग - चिमुटभर 
मीठ - २ चमचे 
साखर - चिमुटभर 
कोथिंबीर - २ चमचे बारीक चिरलेली 

पाककृती 

या डिशची आधी जरा तयारी करून घ्यावी लागते, जरा पेशंस ठेवून भाज्या नीट छान चिरल्या तर दिसतात हि छान आणि छान दिसल्यामुळे भूक हि भडकवतात छान...

१) गाजराचे उभे साधारण एक इंचाचे तुकडे करून घ्या.
 फ्लॉवरची सुद्धा मध्यम आकाराची फुले वेग-वेगळी करून घ्या आणि लगेच सगळी फुले पूर्ण पाण्यात बुडतील अश्या खोलगट भांड्यात घेवून त्यात चांगले २ चमचे मीठ टाकून पाण्यात नीट विरघळवून घ्या. असा हा फ्लॉवर चांगला २० मिनिटे तरी ठेवून द्या.(फ्लॉवर मध्ये कीड असण्याचा संभाव असतो. मिठ्याच्या पाण्याने कीड निघून जाते)
फ्रोझन मटार सध्या पाण्यात बुडवून ठेवा...
१० मिनिटांत नॉर्मल होतात 

२) एका जड बुडाच्या पातेल्यात ३ चमचे तेल घ्या आणि ते तापल्यावर त्यात हिंग टाकून हलके परतून घ्या. आता अग्नी कमी करून यात आधी लाल मिरची तुकडे करून घाला आणि मिरची काळी पडल्यावर पांढरे तीळ घालून व्यवस्थित परतून फुलू द्या. तीळ साधारण सोनेरी रंगाचे होऊ लागल्यावर आता यात तमालपत्र, दालचिनी तुकडे करून घाला आणि वेलची फोडून घाला. आता लवंग, काळी मिरी घाला आणि व्यवस्थित परतून घ्या. 
मसाल्याचे पदार्थ साधारण एक मिनिटभर परता...
जास्त नको...
वास निघून जातो....
हे मिश्रण साधारण कोरडे होताना दिसते आता लगेच यात मीठ आणि साखर घालून साधारण पाणी सुटून मिश्रण ओले होईपर्यंत परता...

३) आता यात आधी गाजरे टाकून चांगली ५ मिनिटे परतून घ्या...
आता यात फ्लॉवर ची सगळी फुले टाकून मस्त ५ मिनिटे परतून घ्या...
मसाला तयार झालेले तेल या सगळ्या भाजीला लागले पाहिजे...
सगळ्यात शेवटी मटार टाका आणि आता पुन्हा ३/४ मिनिटे परतून घ्या.
बास...
जास्त परतू नका...
या तिन्ही भाज्या आपण कच्याही खावू शकतो त्यामुळे या भाज्यांचा जबरदस्त क्रंचीपणा नष्टवायचा नसेल तर येवढीच शिजवा हि भाजी..............

४) आता यात लिंबाचा रस घाला आणि पुन्हा परतून घ्या...
लिंबू रस भाजीच्या काना-कोपऱ्यात छान लागू दे...
आता कसुरी मेथी घाला आणि पुन्हा वरून खाली आणि खालून वर हलवून घ्या....
आणि सगळ्यात शेवटी आता चिरलेली कोथिंबीर वर स्प्रीन्कला...

आता वेळ आली आहे भन्नाट प्लेटिंग ची 

मित्रांनो आणि मैत्रिणींनो...
जे अन्न आपण तयार करतो ते छान प्लेटिंग करणे खूप आवश्यक असते कारण हे छान सजवलेले अन्न आपल्या पोटात भुकेचा आगडोंब उसळवते आणि 'मग आणि मगच' हे अन्न आपल्याला छान पचते ज्याला आपण आपल्या भाषेत 'अंगाला लागते' असे म्हणतो....

चला...तर मग ...हाक मारा घरच्यांना...
अर्थात मसाल्यांच्या वासांनी आत्तापावेतो त्यांना कल्पना आलीच असेल की..."काहीतरी जबऱ्या शिजतंय..."

मस्त ही प्लेट टेबलाच्या मध्यभागी ठेवा...
ताटात  गरमागरम पोळ्या घ्या...
अथवा वाफाळलेला भात घ्या...
वर ही भाजी घ्या...

ही भाजी खाताना मध्ये मध्ये मसाल्याचे पदार्थ येतील दातांखाली...
माझी आपणा सर्वांना नम्र विनंती आहे कि किमान 'थोडे' तरी हे मसाल्याचे पदार्थ या डिश सोबत खा...
हे पदार्थ फक्त वासांसाठी आणि केवळ चवीसाठी नसतात तर या प्रत्येक मसाल्याच्या पदार्थाचे काही ना काही फायदे शरीराला नक्की होत असतात...

चला तर मग...
ताट वाढले आहे...
एक घोट पाणी पिऊन घ्या...
आपला नेहेमीचा भोजन मंत्र म्हणा...
आणि होऊ द्या सुरु.....आक्रमण

एक विनंती...
हि भाजी डब्यात घेवून जावू नका...
गरमागरमच छान लागते...
आणि टीव्ही पाहात पाहात हि भाजी खावू नका...
एक घास घेतल्यावर जो काही स्वाद हि भाजी तोंडामध्ये तयार करते त्याचा अनुभव घ्यायचा असेल तर टीव्ही बंद करा...
आणि आता सावकाश जेवा......

वेडे व्हा..वेडे करा

खुप खा...खूप जगा   

रेसिपी कशी वाटली नक्की सांगा...

आणि  हि डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........

काश्मिरी-दही-भेंडी

काश्मिरी-दही-भेंडी....

नमस्कार मित्रांनो आणि मैत्रिणींनो....

का कुणास ठाऊक...बऱ्याच जणांना भेंडी ही जबऱ्या बहुगुणी भाजी आवडत नाही...
मला प्रचंड आवडते...

हा एक मात्र आहे कि ही भाजी करताना काही काळज्या घ्यायला लागतात...
त्या नीट घेतल्या कि भन्नाट होते भेंडीचा कुठलाही प्रकार..........

सगळ्यात महत्वाचे म्हणजे भेंडी लिव्हर क्लीन करायला मदत करतात,...आणि भेंडी या भाजीमध्ये भरपूर फायबर्स असतात जे आपल्या शरीरासाठी अत्यंत आवश्यक असतात...  

भेंडी आवडत नसेल तरी हि भाजी नक्की आवडेल बघा तुम्हाला..........
त्यामुळे जरी तुम्हाला भेंडी आवडत नसेल तरी हि भाजी अशी ट्राय करा...
दुहेरी फायद्यात असाल...

शरीराला आवश्यक घटक मिळतील आणि...
चटकदार भेंडी हि खायला मिळेल...

नैसर्गिक फायबरने युक्त भेंडी मध्ये विपुल प्रमाणात खालील भन्नाट फायदे होतात शरीराला...

• Vitamins – A cup of contains 26.1 mg of antioxidant vitamin C, which neutralizes free radicals and promotes a healthy immune system. Okra is also a good source of B-complex vitamins, with a cup offering up .211 mg of thiamin, or vitamin B-1, and .088 mg of riboflavin, or vitamin B-2; both are vital for energy production in the body. It also contains .299 mg — or 20 percent of the recommended daily value — of vitamin B-6, or pyridoxine, needed to produce over 100 enzymes involved in protein metabolism. Finally, it provides 453 IU of vitamin A — necessary for the health of the respiratory tract — along with an additional 272 mcg of the beneficial plant pigment beta-carotene, converted to vitamin A in the body.

• Minerals – With 123 mg of calcium per cup, okra provides more than 10 percent of the daily value of this essential mineral, vital for the maintenance of strong bones and teeth. It also contains 216 mg of potassium, needed for stable heart rate and blood pressure, as well as .45 mg of iron, necessary for hemoglobin production. Okra contributes healthy amounts of essential trace minerals, with .69 mg of zinc, essential for wound healing; .136 mg of copper, needed to produce red blood cells; and .470 mg of manganese, indispensable for producing the natural antioxidant superoxide dismutase.

आणि हे सगळ असल नसलं तरी मी आज सांगणार आहे ती "काश्मिरी-दही-भेंडी" ही डिश पंचतारांकीत हॉटेल्स मध्ये खूप लोकप्रिय आहे...

चला तर मग साहित्य बघूया...............

साहित्य 

अर्धा किलो भेंडी - (भेंडी विकत घेताना शक्यतो ४ इंचापेक्षा कमी लांबीची छान ताजी, कोवळी आणि शक्यतो घट्ट भेंडी निवडावीत,भाजीवाला ओळखीचा असेल तर (एखाद्याच भेंडीचे) टोक मोडून पाहावे, एका झटक्यात कटकन मोडणारी भेंडी उत्तम...चिवटपणे मोडता मोडली नाही तर ढुंकून ही अजिबात पाहू नका,

या भाजीसाठी भेंडी आधी किमान २-३ तास चिरून ठेवावी लागतात...
आयत्या वेळी चिरलीत तर अकारण भाजी बुळबुळीत होते )

पाव किलो घट्ट दही - (हे दही किंचित आंबट असेल तर भाजी जास्त छान लागते...
अगदी गोड दही तितके छान लागत नाही...
शेवटी माणसाने आंबट शौकीन असलच पाहिजे ना...थोडतरी किमान  :P :P   )

टोमॅटो - 2 ताजे लालबुंद रसरशीत - मध्यम आकाराच्या फोडी ( धारदार सुरीने तुकडे करून घ्या...
रस गळता कामा नये, भाजीत रस गळला तर भाजीत पाणी जास्त होवून भाजीचे फर्म स्ट्रक्चर बिघडू शकते) 

कडीपत्ता - ३ चमचे भरून 

कलौंजी  - 2 चमचे (याला Onion Seeds ही म्हणतात...२० रुपयाला साधारण २० ग्राम मिळतो हा प्रकार)

धने - जिरे पूड - प्रत्येकी एक एक चमचा 

हिरव्या मिरच्या - ४ उभ्या चिरून घ्या 

तेल - ४ चमचे 

कांदे - २ मध्यम आकाराचे उभे चिरून 

हळद - पाव चमचा 

लाल तिखट - १ चमचा (काश्मिरी डिश असल्याने जर काश्मिरी तिखट वापरू शकलात तर बहार येईल)

कोथिंबीर - ४ चमचे बारीक चिरलेली 

मीठ - चवीनुसार (साधारण दोन चमचे)

हिंग - चिमुटभर (रेडीमेड हिंग आणण्यापेक्षा खडा हिंग आणा...भन्नाट  स्वाद आणतो हा हिंग प्रत्येक पदार्थाला)

साखर - चिमुटभर

जिरं - एक चमचा 

आणि.....तुमच्या पूर्ण कुटुंबाची अपॉईंटमेंट...
कारण ही काश्मीरी डिश सगळ्या जणांनी एकत्र आस्वादणे म्हणजे भन्नाट आनंद आहे....believe me...

पाककृती 

१) बाजारातून आणलेली छान कोवळी छोटेखानी भेंडी मस्त स्वच्छ धुवून घ्या आणि पाण्याने भरलेल्या कुंड्यात ५ एक मिनिटे बुडवून ठेवा.

२) ५ मिनिटानंतर बाहेर काढून एक एक भेंडे व्यवस्थित कोरड्या टॉवेल ने पूर्ण कोरडे करून घ्या आणि बाजूला वेगळ्या कोरड्या भांड्यात ठेवा.

३) भेंडीचे देठ धारदार सुरीने कापून टाका आणि प्रत्येक भेंडीचे आडवे मध्यम आकाराचे चिरून तुकडे करा.

४) जाड बुडाच्या भांड्यात ४ चमचे तेल घ्या आणि ते तापल्यावर त्यात चिमुटभर हिंग टाकून हिरव्या मिरच्या टाकून हलकेच परता आता जिरे टाका , परता , कडीपत्ता टाका , परता,  कलौन्जी टाका, परता, आणि आता सगळेच्या सगळे कांदे टाकून किमान ५ ते ७ मिनिटे कांदा सोनेरी रंगाला येईपर्यंत परता (ज्या क्रमाने पदार्थ दिले आहेत त्याच क्रमाने आणि मध्ये मध्ये सांगितले आहे त्याप्रमाणे परतत परतत राहा...
घाई होते आहे म्हणून सगळ एकत्र सरकवून एकदम परतू नका...
अपेक्षित स्वाद आणि लज्जत यायची असेल तर पेशंस हवाच हवा)

५) अग्नी कमी करा...आता हळद, धने जिरं पूड घाला आणि परता , साखर आणि मीठ घाला आणि नीट परता.....लाल तिखट घाला आणि पुन्हा परता....इथे मीठ आणि साखरेमुळे मिश्रणाला खमंग वास यायला सुरुवात होईल आणि मस्त अंगचे पाणी सुटायला सुरुवात होईल....

६) आता चिरलेली भेंडी या पातेल्यात घाला....अग्नी पुन्हा जरा जास्त करा....५ मिनिटे परता...आणि आता पाण्यात हात ओला करून या पाण्याचा हबका पातेल्यातल्या भाजीवर एक दोन वेळा मारा...(हबका म्हणजे पाण्यात हात बुडवल्यानंतर जेव्हढे पाणी हाताला लागून वर येईल तितकेच पाणी भाजीवर शिंपडणे...
असे दोन वेळा करा...
हबका एकाच ठिकाणी मारू नका...
सगळ्या भाजीवर एकसारखे पाणी पसरले जाईल असे मारा).
आता या भांड्यावर झाकण ठेवून तब्बल ४ मिनिटे काही हि न करता शांत राहा.(एक ग्लास मस्त पाणी पिवून घ्या...
मगा पासून पाणी प्यालं नाहीये...
अधून मधून पाणी पिणे शरीरासाठी आवश्यक असते.)
आता झाकण काढून भाजी एकदा परत...पुन्हा हलक्या हाताने पाण्याचा एक हबका मारा...आता या भांड्यावर झाकण ठेवून तब्बल ४ मिनिटे निवांत रहा...

आता घरातल्या सगळ्या मंडळींना सांगून या कि पुढील पाच मिनिटांत जेवण तयार होणार आहे...
पाणी घ्या...
सगळ्यांना घोटभर पाणी पिवून घ्याला सांगा...
आपल्या शास्त्रांमध्ये आचमनाला महत्व आहे....
ताट घ्या...
लोणचं आणि पापड घ्या...

७) आता भाजी जवळपास तयार झाली आहे...
आता या भाजी मध्ये सगळीकडे नीट पसरून चमच्या-चमच्याने सर्व दही घाला...
टोमाटो घाला...आ
णि सर्व भाजी खालीवर अशी परतून घ्या...
जेणेकरून आत्ता घातलेले दही सगळीकडे सगळ्या भेन्ड्यांना नीट सजवेल...
आणि टोमाटो जरासे शिजून मऊ झाले कि अग्नी बंद करा...
आणि बारीक चिरलेली कोथिंबीर वर पसरून टाका...

८) आता हि तयार झालेली भाजी या पातेल्यातून दुसऱ्या एखाद्या सर्व्हिंग बाउल मध्ये त्वरीत काढून घ्या... 

सगळ्यांना टेबलावर बोलवा...
मस्त प्लेटिंग मध्ये लोणचे , पापड, कांदा, टोमाटो आणि आवडत असल्यास लिंबू घ्या...

भात आवडत असल्यास वाफाळलेल्या भातावर हि भाजी वरून पसरा...आणि विशेष न कालवता कोरड्या भातासोबत खावून बघा.....जबऱ्या लागते

आणि हात जोडून डोळे मिटून भोजन मंत्र म्हणून शांत चित्ताने , सुहास्य वदनाने भोजनाला सुरुवात करा....

एक विनंती...हि भाजी डब्यात घेवून जावू नका...गरमागरमच छान लागते...
आणि टीव्ही पाहात पाहात हि भाजी खावू नका...
एक घास घेतल्यावर जो काही स्वाद हि भाजी तोंडामध्ये तयार करते त्याचा अनुभव घ्यायचा असेल तर टीव्ही बंद करा...आणि आता सावकाश जेवा......

वेडे व्हा..वेडे करा

खुप खा...खूप जगा   

रेसिपी कशी वाटली नक्की सांगा...

आणि  हि डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........

स्टफ पेपर मसाला...Stuff Pepper Masala

स्टफ पेपर मसाला

   Stuff Pepper Masala 

चला मित्रांनो आणि मैत्रिणींनो ,
आज जरा मस्त काहीतरी तिखट आणि झणझणीत खावूया....

अगदी थेट हॉटेल मध्ये, साक्षात एखाद्या पंचतारांकीत हॉटेल मध्ये जेवायला बसल्या सारखेच भासेल तुम्हाला हि डिश तुम्ही मन लावून नीट केलीत तर...नक्कीच
आजची आपली डिश आहे स्टफ पेपर मसाला...

साहित्य 

 चार  जणांसाठी

साधारण एकाच आकाराच्या लाल आणि पिवळ्या बेल पेप्पर्स - ४
(या लाल आणि पिवळ्या मिरच्या नीट बघून सगळ्यांचे बेस नीट मिरची उभी राहील असे आहेत न हे कन्फर्म करा आणि मगच घ्या. आपल्या नेहेमीच्या वापरातल्या हिरव्या भोपाली मिरच्या सुद्धा घेतल्या तरी चालतील पण त्या जरा अधिक तिखट असतात आणि सगळी डिश तयार झाल्यावर या मिरच्या छान टणक उभ्या राहतात आणि हिरव्या मिरच्या मात्र मन टाकतात त्यामुळे स्टफिंग नीट राहत नाही...आणि हिरव्या मिरच्या जरा जास्त तिखट असतात...या लाल आणि पिवळ्या मिरच्या साधारण गोडसर असतात त्यामुळे या डिश मध्ये जबऱ्या लागतात...पुण्यात हि मिरची  साधारण २० रुपयाला एक मिळते)

साधारण मध्यम आकाराचे बटाटे ४
कांदे - २
लसूण - ८ पाकळ्या
आलं  -  २ इंच ( ताजा आणि रसरशीत तुकडा )
हिरव्या मिरच्या - ४ (बिया काढून तुकडे केलेल्या )
तेल - ६ चमचे
वांग - २ (अगदी बारीक चौकोनी तुकडे करा , शिजतात आणि दिसतात हि छान नंतर )
जिरे - ४ चमचे
हळद - १ चमचा
हिंग - अर्धा चमचा
धने पावडर - २ चमचे
जिरे पावडर - २ चमचे
लाल तिखट - १ चमचा (शक्य असल्यास काश्मिरी तिखट अन्यथा कुठलेही चालेल)
साखर - २ चमचे
लिंबाचा रस - ५ चमचे
काळी मिरी पावडर - १ चमचा
आमचूर पावडर - १ चमचा
कलौन्जी - २ चमचे (मूळ नाव Onion seeds पण बाजारात कलौन्जी म्हणून मिळते , घातली नाहीत म्हणून काही बिघडत नाही पण घात्रालीत तर मध्ये मध्ये याची चव या डिश मध्ये भन्नाट लागते, जास्त महाग नसते, घरात आणून ठेवायला हरकत नाही थोडीशी १० ग्राम वगैरे)
कसुरी मेथी - १ चमचा (किंचित कडवट चव छान लागते, आवडत नसल्यास वापरली नाही तरी चालेल)
मीठ - २ चमचे 

पाककृती 

१ ) बेल पेप्पर्सचे (लाल पिवळ्या मिरच्यांचे) देठ कापून आतल्या बिया काढून टाका आणि स्टफिंग भारता येईल इतके मोठे तोंड वर तयार करा. एखाद्या मिरचीचा बेस ओबडधोबड असेल तर तळाचा अगदी पात्तळ काप कापा म्हणजे मिरची छान नीट उभी राहू शकेल.
  
२) एका मोठ्या पातेल्यात पाणी उकळून नंतर त्यात सगळ्या मिरच्या आणि बटाटे टाका आणि झाकण बंद करून घड्याळ लावा. साधारण ८ मिनिटांनी मिरच्या बाहेर काढा आणि आतले पाणी काढून बाजूला ठेवा. बटाटे तसेच पुढे अजून किमान ५ मिनिटे (एकंदर १३ - १३ मिनिटे) तसेच झाकण बंद पातेल्यात उकडू द्या. वेळ झाल्यावर बटाटे बाहेर काढून त्यांची साले काढून अगदी बारीक चौकोनी तुकडे करा , शिजतात आणि दिसतात हि छान नंतर.

३) चिरलेला कांदा, आलं, लसूण , बिया काढलेल्या हिरव्या मिरच्या, कसुरी मेथी, आमचूर पावडर मिक्सर च्या लहान भांड्यात किंचित पाणी घालून पेस्ट होईल असे फिरवून घ्या.

४) एका नॉन स्टिक पॅन मध्ये  २ चमचे तेल घालून तेल तापल्यावर त्यात बटाट्याच्या एकदम बारीक केलल्या फोडी सोनेरी रंग येईपर्यंत परतून घ्या आणि झाल्यावर बाजूला एका प्लेट मध्ये ठेवा.

५) याच पॅन मध्ये आता वांग्याच्या फोडी सुद्धा अश्याच सोनेरी रंग येईपर्यंत परतून घ्या आणि झाल्यावर बाजूला एका प्लेट मध्ये ठेवा.

६) आता  याच पॅन मध्ये २ चमचे तेल घालून तेल तापल्यावर जिरे घाला, साधारण परतल्यावर हिंग घाला...एक चमचा साखर घालून आता किंचित हलवून घ्या....कलौन्जी घाला आणि व्यवस्थित हलवून घ्या....आता यात हळद, धने पावडर आणि जिरे पावडर घाला आणि व्यवस्थित परतून घ्या....आता लगेच याच पॅन मध्ये मगासचे आपण मिक्सर मध्ये तयार केलेले मिश्रण घालून कांदा साधारण सोनेरी होईपर्यंत नीट परतून घ्या. हे मिश्रण साधारण घट्टच तयार होते . अजून पाणी घालू नका.

आता या स्टफिंग चा भन्नाट वास सुटायला सुरुवात होईल...
पण...
तुम्हाला आपला नियम माहिती आहेच...
घरच्यांना जवळपास फिरकू देऊ नका आत्ताच ...
प्लेटिंग केल्यावर थेट टेबलावरच त्यांना या अदभूत डिश चा आस्वाद घेऊ द्या............

७) आता याच पॅन मध्ये मगाशी परतून घेतलेली वांगी आणि बटाटे घालून व्यवस्थित हलक्या हाताने मिक्स करा. फोडी तशाच्या तश्या राहिल्या तर प्लेटिंग करताना छान दिसतात.आता यात तिखट, मीठ, साखर घाला आणि जरासे पाणी सुटले कि मग लिंबू रस घाला आणि २-३ चमचे पाणी घालून व्यवस्थित घट्ट होई पर्यंत परतून घ्या.
हे आपले सारण तयार झाले. हे साधारण घट्ट पण सरसरीत असेच राहावे म्हणजे व्यवस्थित भरता येते.

८) आता घरी असेल तर ग्रीलपॅन वर (हा ग्रीलपॅन नसेल घरी तरी हरकत नाही, आपल्या घरच्या साधारण पसरट तव्यावर हे केल तरी चालेल...No problem ) तेल लावून त्यावर या मिरच्या उभ्या ठेवून त्यात  लहान चमच्याने हे मिश्रण व्यवस्थित भरून घ्या. आणि मंद अग्नीवर आता जवळपास या मिरच्या ५ मिनिटे अश्याच झाकण न लावता ठेवा...आता पुन्हा एक चमचा तेल या ग्रीलपॅन वर मिरच्यांचा आसपास हलकेच पसरा आणि पुन्हा मिरच्या खमंग भाजून घ्या....

आता मस्त चर्रर्र्र आवाज येत मिरच्या तयार होत आहेत...
सगळ्या मसाल्यांचा मस्त गंध पसरत आहे...
भूक लागलेली आहे....
व्वा...
धम्माल आहे...

हा ग्रीलपॅन तसाच्या तसा आता टेबलावर घ्या...एखादा चमचा लिंबाचा रस वर शिंपडा आणि मस्त चिरलेली बारीक ताजी रसरशीत हिरवीगार कोथिंबीर वर पसरा....

गरमागरम पोळ्या ताटात वाढा...शेजारी कांदा, लिंबू आणि टोमाटो सोबतीला ठेवा...

गरमागरम वाफाळत्या भाता सोबतही हि डिश छानच लागते.....

घरच्यांना टेबलावर आमंत्रित करा...

आता भोजन मंत्र म्हणा....

आणि होऊन जाऊ द्या सुरुवात...

आक्रमण.....................

रेसिपी कशी वाटली नक्की सांगा...

आणि  हि डिश केल्यानंतर नक्की कळवा....

भरपेट खा...आरोग्यदायी रहा..खूष व्हा...मस्त जगा

देव बरा करो.........